Центарот за граѓански комуникации на 23 јули ги објави предлог мерките за намалување на корупцијата во јавните претпријатија и установи. Потребата од преземање на мерки доаѓа од високиот степен на корупција која беше детектирана во овој сектор, овозможена од слабата регулатива и политизацијата на овој сегмент. Сево ова резултираше со ниска продуктивност и загуби во работата на јавните претпријатија и установи, како и во намалување на квалитетот на услугите кои тие ги нудат на граѓаните и бизнис заедницата.

Воглавно, предложените мерки се во насока на зацртување на подетални критериуми за селекција и назначување на членови на управните/ надзорните одбори на јавните претпријатија и институции, почитување на професионализмот во оваа област како и зголемување на одговорноста на членовите од управните органи за постигнатите резултати од нивната работа.

Предлог мерките може да ги погледнете и превземете од делот извештаи на страницата на Центарот за граѓански комуникации или овде.

На втората работилница во организација на Центарот за граѓански комуникации се предлагаа мерки за стеснување на просторот за корупцијата во јавните претпријатија и установи. Домашни стручњаци, претставници на надлежните институции и претставници од бизнис секторот на 4 јули ги изнесоа своите сознанија и ставови за спречување на корупцијата во овој сегмент, кој беше детектиран како еден од најранливите во Република Македонија.

Предлог-мерки и експертско мислење изнесоа Вања Михајлова, антикорупциски експерт и поранешен член на Државната комисија за спречување на корупцијата, професорот од Правниот факултет, д-р Борче Давитковски и професорот од Економскиот факултет, д-р Љубомир Кекеновски.

Домашни експерти и претставници на надлежните институции и бизнис секторот дискутираа за потребните мерки што треба да се преземат за намалување на корупцијата во јавните набавки. Работилницата се одржа на 3 мај оваа година во НВО Инфоцентарот во организација на Центарот за граѓански комуникации од Скопје. Ова е прва од планираните шест работилници што се дел од проектот за предлагање мерки за намалување на корупцијата во Македонија.

Преку серија активности што се спроведуваа во периодот од 2005 до 2007 година, ЦГК дефинираше низа мерки што треба да се преземат за стеснување на просторот за корупција во јавните набавки во РМ. Мерките се доставени до сите релевантни институции во земјава од кои се очекува да ги земат предвид во насока на генералните заложби за намалување на корупцијата во РМ. Освен за јавните набавки, ЦГК во следниот период ќе предложи мерки за намалување на корупција уште во неколку други најранливи области.