Вредноста на јавните набавки во земјава на годишно ниво се движи меѓу 600 милиони и речиси една милијарда евра, со што учеството на набавките во бруто домашниот производ на земјата изнесува меѓу 6% и 10%.
Имајќи предвид дека јавните институции управуваат трошат и управуваат со средства во чиешто создавање не учествувале директно (приходите се остваруваат преку прибирање даноци и придонеси од граѓаните и фирмите), ниту, пак, трпат економски последици од нерационалното трошење на тие средства (јавните средства не се лична сопственост на лицата кои управуваат со нив и оттука, нивната загуба не претставува лична штета), се наметнува потребата од постојано унапредување на механизмите кои треба да обезбедат користење на средствата за јавни набавки на транспарентен, законски и корисен начин.
Како особено значајна за успешна реализација на постапките за јавни набавки и за склучување на договорите, се смета фазата на планирање на набавките, како една од трите главни фази – покрај спроведувањето на тендерите и реализацијата на договорите.
Притоа, успешното планирање на јавните набавки синтетизира низа значајни аспекти, како што се адекватно утврдување на потребните набавки, односно на стоките, услугите и работите што треба да се набават, потоа прецизно утврдување на проценетата вредност на набавките и на крајот, правилно поставување на временската рамка на набавките.
Повеќе за истражувањето можете да прочитате на следниот линк
За повеќе информации, ве молиме, контактирајте го Центарот за граѓански комуникации на (02) 3213-513 или на center@ccc.org.mk.
Оваа публикација е изработена со финансиска поддршка од Европската Унија.